كيفاش طورات معرفتنا للكون ؟

لا نزلنا فالتاريخ لتحت ، غا نلقاو تصورات بني البشر عن الكون كانت مجرد تفسيرات لي سوا كانت كاتجي انطلاقا من شي معتقد ، ولا اساطير و لا مجرد ملاحظات ديال العين المجردة ... مثلا كانت البداية مع الاعتقاد بان الارض مسطحة و بلي الشمس كاطلع من بلاصة و كاتغرب فبلاصة كاتخبى فيها باش كايطلع القمر فالليل و فالصباح تشرق الشمس عاوتاني و هكذا ... و الاجرام السماوية و النجوم فالليل كانت كاتعتبر آلهة و ما الى ذلك ... بشوية بشوية و مع ظهور التنجيم بدينا كانراقبو تحركات هاد الاجرام الشيء لي عاونا نبداو نظمو الوقت و الزراعة الخ ... التنجيم غادي يستمر و لي غايبدا يتخلط بعلوم الغيبيات و الشعوذة و التنبؤ بالمستقبل و داكشي الى ان يبدا ظهور العلماء ديال بصح لي غايبداو يشوفو بلي داكشي تخربيق و لي بطبيعة الحال ماغايحملوهومش الناس و غايسميوهم مسطين لكن هادي كانت نقطة اللا عودة حيت غا تبان طرق حديثة في البحث العلمي و غايتحدد المنهج باش غا نبداو نفرقو بين الحقيقة و الخيال ... تما غا يبدا الصراع باش الناس يفهمو بلي الارض مدورة رغم معارضة الكثيرين و رغم اقتناعهم بالفكرة ماذخلاتش ليهوم لراسهم هي ان الارض تدور حول الشمس بحيث جاب ليهم كوبرنيك هاد الفكرة و ماحملوهش عليها ... تطورات الادوات الفلكية مع الوقت و هادشي لي غا يخلي التنجيم يتفرق على علم الفلك حيت واحد مبني على التفاسير و الثاني كان مبني على تحري الحقيقة بالتشكيك فكلشي ... مع ظهور الفيزيائيين من طينة غاليلي و كيبلر و نيوتن غادي تبدا توضاح القضية مع نص قوانين الميكانيك و الجاذبية و دوران الكواكب حول بعضها ... و مع الوقت غادي و معرفتنا للرياضيات كاتطور و مع الثورة الصناعية و تطور العلوم غادي تجي ثورة الرياضيات التطبيقية لي غادا تبدل كلشي و غا نبداو نشوفو العالم احسن ... ظهور ميكانيكا الكم غادي يقلب لينا كاع المعارف ديالنا على الكون و ملي غا يجي آينشطاين و يجيب نظرية النسبية صافي غادي تكمل المنامة ... و فهاد 100 عام اللخرة دارو البشر قفزة نوعية بحيث قدرنا نطلعو للقمر لي ماعمر شي واحد كان كايتصور غا نقدرو نحطو رجلينا عليه ... جا من مورا هادشي تلسكوب هابل لي غادي يحل لينا عينينا على الكون و مدى شساعته و مازال المشوار طويل باش نكتاشفو آش كاين ...
هاد القصة شخصيا كاتعجبني حيت كاتشوف فيها النضج العلمي لدى البشر ، من السجود للشمس الى دراستها و محاولة فهمها ... من عبادة النجوم و تقديم القرابين لها الى البحث في امكانية زيارتها ... العقل البشري و القدرة على التعلم و نقل المعرفة هي لي وصلاتنا لهنا ... لذلك حاولو تقاسمو اي حاجة كاتعرفوها و خليو الميساج يدوز ... المعرفة عمرها كانت ديال شي واحد ، هي ارث ديالنا كاملين الى ان يفنى الكون و من عليه