الكاتب " محمد شكري "

بالمناسبة ديال الدكرى الثالثة عشر لوفاة الكاتب " محمد شكري " غادي نعاود نحط المقال لي كتبت عليه في شهر ابريل الماضي ولي كاين فالباج...
بقلم اسامة البيعلي
اليوم جيت نهضر على محمد شكري و الرواية ديالو الخبز الحافي , من بعد ما ترجمت واحد المقال اسباني كيهضر عليه و خديت منو الافكار المهمين. نخليكوم مع المقال.
محمد شكري تزاد فبني شيكر عام1935. عاش فعائلة فقيرة بزاف و كانو عندهم بزاف د المعانات , منه العنف ديال باه لي كان قتل خوه قدام عينيه . شكري غادي يتمرد على المحيط لي عاش فيه و غلدي يخرج لزنقة و هو فالسن د 11 عام. لكم ان تتخيلوا طفل د 11 عام مجلوق فزناقي د طنجة شنو ممكن يتعرض ليه ( العنف , الدعارة , الشراب , و المخدرات ) . شكري من بعد 9 سنين د التشرد و التسلكيط و التمرد , غادي يقرر باش يتعلم يقرى , كان سيفطو واحد صاحبو عند مدير د مدرسة فالعرائش ...و هنا غاتبدا العلاقة ديالو مع الاداب و الكتبة بصفة عامة ...مهيم من بعد القراية غادي يرجع شكري لطنجة باش يولي رجل تعليم فالسلك الابتدائي و لي دغية غادي يطلب التقاعد النسبي باش يتفرغ للكتابات ديالو...اول نص غادي يكتبو ولي كان عبارة عن مقال سميتو " عنف في البحر " و لي كان تنشر فمجلة الاداب عام 1966. العشق ديالو لاداب خلاه يتلاقا ببعض لكتاب بحال ( بول بولس , تينيس ويليامز , جون جينت ...). شكري كان دار الترجمة د بعض القصائد د " لوركا , ماشادو " و لكن ما غادي يتعرف حتى يخرج التحفة " الخبز الحافي " سنة 1973 و لكن الفرحة ما غاديش تكمل حيت هاد الرواية غادا تمنع فالعام العربي و ما غادا تخرج حتى لسنة 2000.
الخبز الحافي , غادا تخرج اول مرة باللغة الانجليزية سنة 1973 بقلم الكاتب " بول بولز " لي كان كتبها غي من خلال الحوار لي دار مع شكري باللغة الاسبانية ( حيت شكري كان كيهضر بالاسبانية كتر من العربية ) . من بعد الترجمة د الانجليزية " الخبز الحافي " غادا تخرج بربعين لغة اخرى بحال اللغة الفرنسية لي ترجمها الكاتب المغربي " الطاهر بنجلون " و الترجمة الاسبانية لي خرجها المترجم المغربي " عبد الله ادجبيلو " ..... من بعد 20 عام غادا تبان الخبز الحافي بالعريبة و لكن دغية غا تمنع و ما غادا تنشر بصفة علنية حتى لعام 2000.
القصة كتهضر على واحد العائلة من الريف لي غادي تهاجر من الناظور " قرية بني شيكر " الى طنجة بسبب المجاعة , ولكن القساوة ديال رب العائلة , غادا تخلي " محمد " يخرج يقلب على حياتو فالزنقة , هنا غادي يتقاتل مع الخوف و الجوع و المجتمع لي كان عامر بولاد القحاب ...ولي غا تخليه يكون نمرود ...الحياة دايزة ما بين البيران و ديور القحاب و الشفرة ....تا من طوارو د الزبل ما خلاهمش فالتيقار ....هادشي لي غادي يكون سباب القوادة فالكتبة .
من بعد الخباز الحا في خرجت التممة ديالها بعنوان " زمن الاخطاء " و الجزء التالت د هاد السيرة الداتية لي سميتو " وجوه " .... شكري كان من عشاق الموسيقى و الويسكي .. شكري عاش الحب تلاتة د المرات و لكن خلاه بينو و بين راسو .... بقا هكاك حتى مات و حيد فالرباط عام 2003