كاين واحد المؤشر إقتصادي إسمه مؤشر الحرية الاقتصادية كيعبر على أكثر الدول عندها سوق حر وإقتصاد ليبرالي
وفي الطليعة كاين هونج كونغ، سنغافورة، نيوزيلاند، سويسرا
هونغ كونج لي هي الأولى في حرية السوق ولي مطبق فيها نظام ليبرالي إقتصادي لأقصى درجة، و فيه الحكومة عندها تدخل قليل في السوق، ومع هذا 1000 مدرسة من أصل 1100 تابعة لنظام التعليم الحكومي المجاني والدراسة الإبتدائية والثانوية مفروضة على الجميع ⠀
سنغافورة لي عندها واحد من انجح الأنظمة التعليمية في العالم، ومع التوجه الإقتصادي الليبرالي ديال البلاد، أكثر من 70% من مدارس التعليم الثانوي والإبتدائي هي مدارس ديال الدولة و عندهم جميع التلاميذ من عائلات فقيرة أو متوسطة كيتلقاو الدعم
نيوزيلاند لي حتى هي دولة رأسمالية ليبرالية بإمتياز، التعليم فيها يحتل مرتبة طالعة في العالم و في تصنيف دارتو منظمة التعاون الاقتصادي والتنمية جا التعليم في نيوزيلاند في المرتبة السبعة في العالم من ناحية تعليم العلوم والقراءة ، مع العلم أن هاد الدولة فقط 3% من التلميذ ديالها كايمشيو للمدارس الخاصة، ما تبقى كايمشيو لمدارس الدولة المجانية.
سويسرا هي الأخرى، 5% من التلاميذ ديالها فقط كايمشيو لمدارس خاصة، وما تبقى كيدخلو للمدارس الحكومية، والتعليم ديالها حتى هو من الأوائل في العالم (تم تصنيفه الأول من طرف المنتدى الاقتصادي العالمي)
هاد الدول رأسمالية ليبرالية بإمتياز، أكثر من الليبرالية لي يقدر يستوعبها بنكيران ومن معه، لكن ما عمرهم دارو الخشونة مع التعليم أو بغاو يخوصصوه كامل أو يحيدو المجانية ديالو كيف كيفكر بنكيران لي تم قبول مشروع الرأي ديالو حول إلغاء مجانية التعليم لي عرض على المجلس الأعلى للتربية والتكوين،
حيث هاد الدول عارفين أنه وخى ما عندهومش بترول أو غاز طبيعي لكن الشباب المتعلم هم الثروة ديال البلاد الحقيقية وبهم غادي يزيدو يكملو في طريق التقدم،والتعليم العمومي هو الوسيلة الفعالة باش يعطيو للجميع فرصة متكافئة يديرو شي حاجة في حياتهم و يزيدو ببلادهم للقدام.
ولكن آش غادي نعرف أنا ولا الناس المسؤولين في سويسرا و سنغافورة ونيوزيلندا...
الشعب المغربي العظيم إختار العدالة والتنمية لي بدورها و بموافقة المخزن اختارت أنها تمشي في طريق إلغاء مجانية التعليم،
لكن على الأقل ما كايسرقوش .
