الفلسفة

الفلسفة ماشي شي حاجة بعيدة عليك ولا عمرك ما قربتي ليها ولا ماعمرك ماطحتي فيها ، ولكن راها قريبة منك كثر ماكتوقع ، بطبيعة الحال السبب الرئيسي وهو ان الفلسفة هي لي كتخليك تسول ، وكتولي تطرح أسئلة في عمق الحياة ، وضروري مايكون شي نهار سخن عليك راسك شوية وقلتي ندير فيها فيلسوف وبديتي تسول
أسئلة ،بحال منين جا هاد الكون ، وكتزيد تعمق في الأسئلة وماحدك كتعلم في المدرسة وكتكتاسب معرفة جديدة،وكتقول بلي هاذ الكون عبارة عن مادة ، إوا هاد المادة منين جات، وفاش صالحا ، واش المادة متحركة ولا جامدة واش كاينة شي حاجة كتكون الكون من غير المادة ، واش كاينة شي حاجة غير مادية ، واش الكون كيخضع لقوانين حتمية قهرية ، ولا كيخضع لشي قوانين وغايات وأغراض وأهداف ولا هادشي عبثي ومعندوا لا ساس لا راص ، وتقدر تجي من اللخر وتقول شنو كنقصدوا بالكون بعدا ، وشنو كنعنيو بالمادة ( بعيدا عن جواب العلم )
وكتبدا عوتاني تعمق وتقول دبا انا كنفكر بلا ماندير الصوت او بلا مانهضر جهرا ،إوا كيفاش كنقدر ندير هادشي واش داك العقل لي كيديرو ليه السكانير هو لي فيه هاد الصوت وهو لي كيجي منو ، وتقدر تبعد كاع وتبدا تسول شنو الفرق بينك وبين داك البيبي لي ديما كيكون مدهوش من الأشياء لي كتوقع ليه في حياتوا عكسك نتايا مني كبرتي وكيجيك داكشي لي كيتعجب منو الطفل راه حوايج تافهين ومكاين لاش تدهش منهم ومع ذلك كتجيك غريبة تحاول تدهش بحالو او كيجيك ادهش وهو كيفاش الدري صغير كيفكر اصل !
وتقدرتغير الموضوع و تسول ماذا يعني تكون إنسان ، وماذا يعني انك تكون حي ،وماذا يعني انك تكون ميت، وشنو الفرق بين انك تكون إنسان حي او إنسان ميت! ومن هاد لعجب كامل تقدر توصل حتا لواحد تساؤل كبير ومهم وهو واش انا قادر نطرح اي سؤال ولمقود كاع واش انا قادر نلقى اجوبة لكاع هاد الأسئلة لي طرحت ونولي نعرف كلشي ، واش كاين شي حدود فهاد معرفتي لكلشي ، وكيفاش نقدر نولي نعرف هادشي .
كذلك كيما كتعرفوا بلي الدنيا من حولنا او محطينا بشكل خاص عامر بالمواضيع او الموضوعات او الموجودات الشيقة والجميلة والخيبة والكريهة ، ولي تخليك تبدا توقع فواحد السلسة من التساؤلات وتسول حتا شنو كنعنيو بأن هناك مواضيع شيقة او موضوعات شيقة ، ولا جميلة ، مني كتكون كتشوف في المحيط ديالك واش كيبان ليك شي تجلي لشي تشويق فيه او جمال ، اولا كيبان ليك غير الخيوبية والعيفان ! وشنو كنقصدوا بالجمال والخيوبية أصلا! وكيفاش ان الجمال لي كنحس بيه مختالف على الجمال لي كيحس بيه داك خونا لي كيشوف
شي رسمة في معرض فني وكيبقا يحلل فيها ونتا مافهم حتا خصية كيفاش كيجيب داكشي مع العلم انه إنسان بحالك وكتلقاه يقدر يخسر
زبابل دلفلوس على شيئ بالنسبة لك غير جميل بالمرة وهو كيقوليك بلي راه من اجمل الأشياء لي شافها فحايتو !
هاد الأسئلة لي حاولت نقدم بها أمثلة راه كتعتبر مشكلات فلسفية، والفلسفة كتعني انك تفكر فيها وتطرح اسئلة بحالها او هي نفسها، وتبقى تشوفيها بنظرة تأمل وتدرسها ، ولكن هاد الدراسة خاصها تكون منظمة باش تحاول توصل للإجابة وهادشي هو لي كنقصدوا بالفلسفة
مني كنهضرو على المذاهب المادية والمثالية .. إلخ كتعتبر مذاهب كتحاول انها تجاوب على أمثلة للأسئلة لي عطيت لفوق وضروري من ان كل إنسان عادي كيسول هاد الأسئلة وكيجاوب عليها بطريقتوا الخاصة وبطريقة تفكيرو ولي غالبا كتكون طرق بسيطة وبعض المرات مكلخة او ساذجة ، وداكشي علاش كنسمعوا بلي كل بنادم عندو فلسفتوا الخاصة بغا ولا كره ، وهادشي كيعني ان كل واحد فينا
عندوا طريقة خاصة في الحياة ، وكيفاش كيشوف الكون والناس من حولو
وكيكونو عندوا مبادئو الخاصة وكيفاش كيشوف الأمور وكيفاش كيقدرها وكيقيمها ، وكذلك كتكون عندوا زاوية خاصة كيحكم بيها على كيفاش كتدوز حياتوا ، والفلسفة ما هي في واقع الأمر إلا هادشي ،
غير ان الفارق بين إنسان عادي وإنسان فيلسوف هو ان الفيلسوف كيشوف داكشي بشوية دلعمق ، والترابط وكيكون تفكيرو منظم ومتماسك وصريح ، و عاد اتلقاو ان الفلاسفة في غالبة الأوقات
كيحاولو يبتاكرو كلمات خاصة وكتعكسهم هوما وكيوصفو بيها أشياء كتعنيهم ، يعني بخلاصة كيقدرو يبينو حتا كلمات إصطلاحية خاصة.
نجيو لمعنى اللغوي ديال فلسفة ، كنظن مكايناش شي لغة كتطلق على الفلسفة إسم من غير شي حاجة قريبة من philosophy ، حيت اصلا الكلمة يونانية الأصل وكتكون من كلمتين او مقطعين،
واحد هو philos ولي كيعني الحب ، وsophia كتعني الحكمة ، ومن هنا كنفهموا بلي الفلسفة ماكتعني غير حب الحكمة او محبة الحكمة ، والحكمة باش نكون دقيقين كثر فراه كتعني عند اليونانيين
المعرفة بكاع ألوانها واشكالها وتجلياتها ، والمحبة كتعني انك تكون شغوف بشي حاجة وكتوجه دائما ليها ، وماشي كتعني غير داك الشعور دالمحبة او داك الإحساس دالحوب ، وداكشي علاش
الفلسفة كتعني انك تكون شغوف بمعرفة المعرفة بكاع اشكالها وتجلياتها ، والفيلسوف كيعني محب للحكمة ، واول من سما راصو بهاد الإسم هو فيتاغورس ، pythagorac ، ومن بعدو جا سقراط ،
وسما راصوا تاهوا فيلسوف ، ولكن السبب هو باش يميز راصوا على دوك السوفسطائيين sophists لي كانوا فوقتوا ولي كيقولو على راسهم حكماء ، اصلا كيما كتلاحظوا كلمة sophists قريبة من sophia
وكان قال واحد المقولة مبوقصة ولي كيحاول يبين فيها ان الحكمة ماكتكون غير عند الإله فقط وماشي عند البشر. والفلاسفة مانقدرو
نسميهوهم إلا بمحبي الحكمة ومايقدروش يوصلو لصفة إلاهية بحال الحكمة. وهنا باين إنتقادوا للسفسطائيين وتواضعوا فنفس الوقت.