الشغف من أسرار النجاح

تقدر تكون واعر , تقدر تكون مقود , تقدر تغلب العالم , تقدر تغلب الحرب , تقدر تهدر مع سيدي ربي سير دق عليه فبابوا.
مجرد كلمات فأغنية , كل واحد أو كيفاش يقراهم و كل واحد و كيفاش يقدر يحللهم , و لكن لا يختلف إثنان على أن الرسالة الواضحة و الجلية من هاد الكلمات هو أنه بمقدورك دير لي بغيتي إذا بغيتي , كاتبقا الرغبة هي العامل الأول و الوحيد للنجاح في كل شيء .
و لكن منين نقدر نجيب هاد الرغبة دالنم باش حتى أنا ننجح فداكشي لي بغيت ؟؟
أولا : كون بوزيتيف أساط
قبل ماتكون عندك الرغبة , خاصك تكون كاتفكر بإيجابية فأي حاجة , حيت السلبية كاتصعب عليك المأمورية باش تحقق الأهداف ديالك , و بغيت نذكر قبل مانكمل أن هادشي ماعندوش علاقة بقانون الجذب Law Of Attraction , حيث ماشي ديما التفكير الإيجابي كايجلب الإيجابية و السلبي كايجيب السلبية , أصلا علميا هادشي خطأ , و لكن من الممكن أخذه من جوانب أخرى .
ثاني حاجة : تكون عندك الثقة فكرك
من بعد ما تكون تشبعتي بالأفكار الإيجابية , فإبن ثقتك في كرك , أو ماتحكرش راسك , يعني دير الثقة بلي نتا أو نتي قادرين توصلوا لداكشي لي بغيتوا , أو ماكاينش لي يقدر يحبسكم من داكشي لي بغيتوا إلا كرك , نتا تقدر توصل راسك , لا تحبس راسك , و أيضا خلي أي حاجة فيك سلبية إيجابية بحيث إيلا كانت فيك شي مشكلة سواء جسدية و غيرها , فبقا تعاير بيها كرك باش تحس بيها شي حاجة عادية أو إيلا جبدها شي واحد قدامك تجيك عادية جدا .
ثالثا : يكون فيك الجوع .
آه , كون مجواع , يكون فيه الجوع بحالا ضارباك المجاعة , يعني يكون عندك الشغف لداكشي لي بغيتي بحال مني كايكون فيك الجوع أو عندك شغف للماكلة , أي يكون فيك الشغف باش أنك توصل لداكشي لي بغيتي .
رابعا أبب : عرف كرك غادي تفشل .
كيفاش ؟ يعني أنمي من بعد ما تشبعتي بالأفكار الإيجابية , و تجوعتي على داكشي لي بغيتي , دير فبالك أنه غادي يجي واحد الوقت و غادي تفشل , غادي طيح للأرض أو غاتاكل دقة مقودة , ممكن يكون السبب ديال الفشل ديالك هو نتا بكرك , أو ممكن يكون شي حاجة وحداخرا , خاص تعرف فهاد الحالة كيف تقدر أنك توقف على رجليك أو ماتخليش هاد الفشل حافز ليك باش تحبس , بل ديرو حافز باش تنوض و تثابر من جديد باش توصل لداكشي لي بغيتي عاوتاني بروح جديدة .
دابا مني وصلتي لهنا , عرف راك مهتم بالفعل , هادشي كامل غير تحضير باش تبقا موتيفي ديما , دابا كاتجي مرحلة تطوير هاد الرغبة لي عندك .
أولا : حدد أهدافك " بإيجابية " :
أقصد هنا أعشيري الغالي , خاصك تبقا تحدد الأهداف ديالك بنوع من الإيجابية , و ركز عليها مزيان , فكمثال بسيط , بلاصة ماتقول " مابغيتش نكون فقير , قول " غانوفر مقدار ديال الفلوس هاد السيمانة-الشهر , أو هانتا حددتي الهدف بإيجابية أو طلع ساهل باش تحققوا . 
ثانيا : خليها صغيرة تاتكبر .
على أنغام إيلا خيابت دابا تزيان , فهنا خليها صغير حتى تكبر , أعني هنا الأهداف , يعني ماتجيش من أول وهلة و تقول أنا بغيت نولي مهندس , قول غادي نجح فالباك بنقطة مزيانة كهدف أولي , موراها ندفع لمدرسة المهندسين , موراها نتخرج أو نولي مهندس , غايولي عندك الحماس كثر حيت قسمتي الأمور أو قاديتي الأولويات أو غادي تطبق او ماغاديش تعكز .
ثالثا : دير داكشي لي كايعجبك
عمرك دير شي حاجة رغما عنك ولا شفتي خوك أو جارك أو ولد خالتك دار شي حاجة أو نجح دير فحالوا , حياتوا هاديك أو حياتك هادي , دير داكشي لي كاتبغيه و لي كاتسمتع بيه . حيت إيلا درتي داكشي لي كاتبغي , عمرك ماغاتخدم شي نهار
رابعا ماتسوقش للماضي .
كيفما قال فاينبرت من قبل , الماضي و المستقبل غير موجودين فالأصل , عيش اللحظة , لأن الماضي وليد اللحظة و المستقبل أيضا , اللحظة هي لي كاتولي ماضي و هي أيضا لي كاتعطي نظرة على المستقبل , فعش اللحظة أثبي .
خامسا : عمرك تخاف من الأخطاء .
عمرك تخاف من الأخطاء , و لا تخلي الخطأ سبب الإنسحاب , خصوصا إيلا كنتي كادير الحاجة لأول مرة , فالأخطاء هي لي غادي تخليك تكون أحسن فديك الحاجة , و هي لي غادي تخليك تتعلم من هنا القدام شنو تبقا الدير .
سادسا : خلي حداك الناس الراغبين Motivators
هاد النقطة مهمة , كلما كان معك ناس كايشوفوا الأمور بواحد النظرة إيجابية , كلما كان الناس لي حداك راغبين و يوقع لي يوقع كايبقاو متشبثين , فذلك كاينعاكس عليك , و العكس أيضا صحيح , لهذا فبلاصة ماترافق الناس لي ماعندهاش الشغف لشي حاجة و تخرج على كرك , سير مع الشغوفين أو ولي حتا نتا شغوف أيضا .
سابعا : استمر في التعلم
التعلم عمروا ماكايحبس , بقا ديما طالب للمعرفة , ماشي التعلم ديال المدرسة , بل التعلم بصفة عامة , قرا داكشي لي كاتبغي أو عمرك تحبس من القراية , كلما تعلمتي كلما تحسنتي .
ثامنا : حط أهداف كبيرة .
من بعد ماقدرتي توصل للأهداف الصغيرة لي حطيتي فاللول , دابا حلم كبير , دير أهداف كبيرة و كن واثق أنك غادي توصل لدوك الاحلام , أو ديما دير الأحلام لي ختاريتي فبالك باش تلقا راسك ديما قريب ليهم حيت إيلا نسيتيهم غادي تبقا تلقاهم بعاد عليك أو ماغادير حتا شي خصية .
هادشي كايبقا جزئي , كل واحد و كيفاش ممكن يشوف الأمور فهادشي لي كتبت .