ما هي سيكادا3301 ؟

سيكادا فاللغة هي اسم واحد الحشرة معروفة بالطنين وسميتها بالعربية (الزيز) (الصورة 1) ، ولكن بالنسبة لخبراء الأنترنيت هي واحد اللغز لي باقي ما تلقاش ليه الحل ، هي عبارة عن ألغاز كانت كتحط فمواقع التواصل ما يقدرو يحلوها إلا العباقرة ديال البرمجة الشيء لي خلا الجميع يتساءل على شكون الجهات المسؤولة على هاد الشيفرة ؟ كل فئة بدات كتعطي فرضية كاين لي قال أن الماسونية هي لي وراء هدشي ، كاين لي قال وكالة الاستخبارات المركزية الأميركية (CIA) ، كاين ل قال لا نازا ،كاين لي قال هادو مجموعة الأنونيموس وهادي طريقتها فتجنيد أعضاءها ، كان لي سباها فالإف بي آي ، لي سباها فشركة غوغل وزيد وزيد ... ولكن هدشي كامل كيبقا غير فرضيات حيت حتى ليومنا هذا باقي مالقاو حتى واحد من الناس لي نجحو فالاختبار ولا كشف هويتو حيت هاد الناس باش يختارو كيبقاو يغربلو فالعباقرة حتى كيبقاو غي النخبة ، ولي معروف أن هاد الناس باغين هاد اللغز يبقا سري ويمكن أن لي كيربح كياخد لي تشهاها باش مايسرب حتى معلومة ...
ايمتا بانت سيكادا3301 ؟
أول ظهور كان ف5 يناير 2012 تنشرات صورة فيها ميساج بلونغلي ورمز الحشرة لي هو أشبه بالفراشة ، لي بغا يقرى الميساج راه فالصورة لتحت (الصورة 2) والترجمة ديالو هي : "مرحباً: نحن نبحث عن أشخاص فائقي الذكاء، ولإيجادهم، قمنا بتصميم هذا الاختبار، هذه الصورة تحتوي على رسالة مخفية، وحين تجد الرسالة سترشدك إلينا، نتطلع إلى لقاء أولئك القلائل الذين سيتمكنون من إكمال الطريق حتى نهايته، نتمنى لكم حظاً جيداً" وكاتبقا كل عام كيعاودو اختبار فنفس الفترة من السنة .
هاد الناس باش عرفوهم مقودين ، اللغز ديالهم مافيهش غير البروغراماسيون صافي وإنما باش تحلو خاصك تكون على دراية بالنظام الرقمي لحضارة المايا، والموسيقى الكلاسيكية، و الأدب النثري والشعري ، واللوحات الفنية وزيد وزيد يعني باش تدوز من مرحلة لمرحلة خاصك تكون ملم بمعظم العلوم ومثقف (ماشي بثقاف الفقهة ههه) ، وفالأول كيبداو غي فموقع من مواقع التواصل وكيبقاو مرحلة بمرحلة حتى كيوليو خدامين مع الناس غي فالديب ويب ...
ف2012 كان واحد خبير أمن إلكتروني سميتو جويل إيريكسون مكونيكطي وهي تبان ليه واحد التصويرة لفتت انتباهو (الصورة 2) ولقا فيها الرسالة المعلومة (بلاما نحتاج نعاودها حيت ديجا ذكرتها) لمهم استرعاه الفضول ودفعو يحل هاد الأحجية وأول حاجة خاصو يبدا بيها هي طريقة تحاول تبين الشيفرة المخبية فالتصويرة ولقا أنه خاصو يبدل شي نقيش فدرجة الكولور فكل 100 بيكسل باش كتبان تصويرة اخرى بلاصة الصورة الاصلية ، ملي حل الجزء الاول بديك الطريقة لقا إشارة للإمبراطور الروماني كلوديوس وشي أحرف مافهمهاش السيد دورها فراسو وقال يمكن تكون شيفرة قيصرية لي هي أسلوب ديال التشفير (بلاما ندخلو فلي ديطاي ديالو ايلا بغيتو تقلبو عليها شوفو الحاج غوغل) هي هاديك السيد حل الشيفرة بهاد الاسلوب ولقا وسط التصويرة سيت مخبي ، دخل لداك السيت وهي تطلع ليه بطة ومكتوب حداها بلونغلي ما ترجمته : "اوبس ... لقد وقعت في الفخ.. يبدو أنك عاجز عن الوصول للرسالة" لي بغا يشوف الصورة الاصلية (الصورة 3) ، خونا ماحس لا بإحباط لا بوالو بل قال يقدر يكون هذا غير تلميح شد التصويرة وجرب يحلها ببرنامج "آوت غيس" لي هو برنامج كيفك الشيفرات ولقا رسالة مخبية سيفطاتو لسيت معروف سميتو "ريديت Reddit" ، فاش دخل لقا رموز معقدة وشيفرات كترجع لحضارة المايا بقا مضارب معاها حتا حلها ،خونا هدشي كامل وحس أنه مابذل حتى مجهود لأنه وعلى حساب هضرتو تال هاد المرحلة باقي دكشي ساهل ولكن من بعد غيزيد يصعاب دكشي وغيولي كيخدم بالايكزاديسيمال (صحاب البروغراماصيون كيعرفوه) ، نكملو ملي حل رموز شيفرة المايا قادتو لديوان شعر كيروي قصة استلام الملك الإنكليزي آرثر كيعود لفترة ما قبل المسيحية ، فاش حلها لاحتو لقصيدة الكترونية ديال الشاعر ويليام غيبسون كان خرجها ف1992 كان مخرجها غي فالديسكيط (ايييه عليك ايامات الديسكيط) وكان مبروغراميها باش ايلا تمزكتي ليها مرة وحدة كتمسح اوطوماتيكمو ، لمهم الشيفرات بقاو غادين وكيصعابو حتى ولاو المبرمجين والهاكرز كيتجمعو فمنتديات وكيخدمو مجموعين باش يحلوها ، فواحد من دوك المنتديات لقا ايريكسون أن الحل ديال الشيفرة لي مخبية فالقصيدة هو ميساج " عيط لينا فهاد النمرة 9608ـ390ـ214" فاش عيط ليهم لقا رسالة فيها أنهم خاصهم يرجعو للمرحلة اللولة ويستخرجو الاعداد الاولية ويضربوها فبعضياتها ، خونا جربها وهو يطلع ليه رقم 845145127.com لقاه سيت وملي دخل ليه طلع ليه اللوغو ديال حشرة الزيز لي كان فكل رسالة + طلعات ليه ماغانة كتعد تنازليا فاش سالا وقتها ووصل العد ل0 طلعات ليه إحداثيات جغرافية فالجي بي إس كتقود ل14 بلاصة فالعالم (وارسو، باريس سياتل، صول، أريزونا، كاليفورنيا، نيو أورلينز، ميامي، هاواي، وسيدني) ، مشاو كاع دوك لي كانو مضاربين علي الحل ديال سيكادا3301 للمواقع المذكورة ولقاو وراقي لاصقين فلبوطوات ديال الضو فيهم رمز الحشرة + شيفرة بصرية (QR) مصايبة باش تقراها لكاميرا ديال التيليفون وتعطيهم سيت لي منو غيمشيو للديب ويب (الصورة 4) ، هاد الناس فاش صممو السيت داروه باش يستقبل عدد معين ديال الزوار وملي فاتو العدد ولا السيت كيطلع هاد الميساج "نحن نريد الأفضل، لا التابعين" يعني هوما كان كيبان ليهم ايريكسون ولي فحالو مجرد تابعين ...
ايوا صافي خونا تال هنا سالات قصتو مع سيكادا القصة لي وثقها الصحافي كريس بيل من صحيفة التلغراف البريطانية ، ولكن أشنو جرا للناس لي ربحو ونجحو يحلوا اللغز ؟ فين مشاو ؟ علاش مابانوش ؟ علاش باقا حتى جهة ما تبنات سيكادا ؟ علاش وعلاش ..؟ بزاف الأسئلة لي كتطرح راسها وباقي ماتلقاش ليها جواب إلى يومنا هذا ...
إلى هنا ينتهي المقال .