السلام عليكم
جيت نهضر شوي على لاصيرونص ولي لاحضت أن الأغلبية كايديرها ولكن مافهمش شنو هي حيث هادوك عندمن كايقطعو ماكايشرحو ليهوم والو المهم هو إقادو ليه وراق الطوموبيل باش مايشدوش البوليسي وباش إتعوض إلى دار كسيدة
نبدا التعريف ديال لاصيرونص بشكل عام عاد نهضر على لاصيرونص ديال الطوموبيل
التأمينات هي واحد العقد بينك وبين واحد لا جونص باش إحميو ليك شي حاجة عزيزة عليك كيفما بغات وتكون فمقابل واحد المبلغ معين
دبا غاندوي على التأمينات ديال الطومبيلات إلى ماعندكش طومبيل إذن نت بحالي ولكن كاتعرف شي واحد عندو ولا تقدر ديرها
لاصيرونص لي كاتقطع ولي هي الإجبارية كاتسمى responsabilité civil بمعنى المسؤولية المدنية
هادي راه ماكتحميكش نت هادي كاتحمي الأخر لا قدر الله دخلتي فشي واحد وتبين بلي نت السبب لا صيرونص ديالك كاتعوض هاداك لي ضربتي
و هنا غاتفهم بلي نت كاتعوض في حالة ماكنتيش فوتيف ولاصيرونص ديال لي ضربك هي لي كاتعوضك على الخسائر لي تسبب فيهوم
قبل مانهضر على الفلوس أنهضر على واحد الحاجة مهمة ولي هي أنه الشيفور ماكايتعوضش في حالة كان فوتيف إتهرس ولا يموت كاع ماحدو فوتيف مغايتعوض والو
زيد أي واحد طرات ليه كسيدة ولا مات وهو فإطار الخدمة مكايتعوضش بالمسؤولية المدنية وإنما كايتعوض فحادثة عمل
وهاد الناس إلى بغاو إتعوضو من لاصيرونص ديالهوم كاين لي كايتسماو ب les garanties annexes هادو ماشي إجبارين نت كاتزيدهوم إلى بغيتي
هاد لي غارانتي فيهوم
protection de conducteur : حماية السائق هدا إلى زدتيه كنتي فوتييف ولا ماكنتيش فوتيف شيفور كايتعوض
INCENDIE : الحريق تعويض على الحرائق إلى شعلات العافية فطوموبيل ولكن ماشي غير أجي وتعوض ماشي تهز بوطة فطومبيل تفركعات وتجي تطلب التعويض
brise glass : التأمين على زاج إلى تهرس ليك زاج ولا هرسو ليك شي واحد أتعوض فيه غالبا كاتعوض ديريكت وإلى كان زاج ساوي كتر من 3000 درهم ضاروري مايشوفو الإكسبير
ومزال الخير كتار إلى جيت نكتب كل واحد مانساليش
دبا نهضروعلى الثمن كيفاش كايتحدد
أولا راه كاع التأمينات كايقطعو بثمن واحد ولي نقص ولا زاد غايقودها المهم أنشرح ليكوم التصويرة فاش كاينين الأثمنة
الثمن ديال لاصيرونص كايتحدد حسب الطومبيل
واش إصونص ولا مازوط
و شحال دالخيل فيها
شحال دالمدة باغي تقطع
وأخر حاجة واش عندك التخفيض ديال 10% هاد التخفيض كاتاخدو في حالة دوزتي عامين ديال التأمين متابعة ومكايهمش فين قطعتيها ولا فين غاتاخد التخفيض إلى عندك عاميين أي أصيرونص مشيتي ليها غاتعطيها ليك بالفرحات عليهاااا
الصورة لتحت فيها لي طاريف نورماليعني لي مافييهاش التخفيض ولوخرى بونيفيي يعني لي فيها ت التخفيض
الأثمنة لي فصورة راه ديال المسؤلية المدنية بوحدها يعني دوك لي كارانطي ماداخلينش فالحساب كل غارانطي والثمن ديالو
وكايبقى الفرق بين التأمينات فطريقة التعامل وكيفاش كايصبغ ليك الكوميرسيال الهضرة و لي غارانطي لي تايعطيو فابور
باش مانطولش هادشي بنسبة لتوريزم أشخاص عاديين بالنسبة لناس لي تايهزو سلعة عندهوم لي طاريف بوحدهوم وحتى لماطر بطاريف وحدين أخرين نكتب عليهوم شي نهار أخر .
