موسوعة جينيس للأرقام القياسية معروفة بأرقامها لغريبة، ولكن واحد الصاط ميريكاني قالهم ماتعرفوش، من بين كل المواهب لي حاملاها الموسوعة ، " جوناثان لي ريتشز " قالهم نتوما كاملين ولادي، هاد السيد لي فالصورة هو أكثر واحد رفع قضايا للمحاكم فالعالم كلو، 2600 قضية دخل بيها غينيس من بابها لعريض.
الغريب ماشي غير العدد ولكن ملي تعرف أنه رفع قضايا مثلا على : جورج بوش، قراصنة الصومال، بريتني سبيرز، مارثا ستيوات، أفلاطون، نوستراداموس، جيمس هوفا، نصب لينكولن التذكاري، برج إيفل، جزيرة الثلاث أميال، رئيس إيران و حتى بديل الزبدة، زيد عليها الأم ديالو حيت زغبها الله و قالتلو واحد النهار أنها فصغروا كانت خدامة و كاتخليه فالدار ، ألور رفع عليها دعوى بتهمة الإهمال، و دعى خوتو و عائيلتوا كاملين و جيرانو كاملين كل واحد و التهمة ديالو، رفع دعوى على شركة روك ستار مالين لعبة GTA لأنها من هضرتو، صدناتو و هو فسن المراهقة وزيد وزيد راه ألفين و ستميات قضية ا شريف.
من مجمل القضايا لي ربحها ، جوناثان ربح تقريبا 850 ألف دولار.
ولكن سطاج الوحش، هو ملي دخلوه فموسوعة غينيس، سي جوناثان رفع عليهم دعوى اتاهمهم فيها بنشر المعلومات الشخصيةديالو دون موافقته.
عييت نشوف فالغرائب ولكن هاد السيد قالهم ماتعرفوش.
نتمنى يكون مشغول و مايقراش هادشي باش مايرفعش دعوى حتى عليا.
راك عزيز اخويا جوناثان حق الرب
آه نسيت، غاتقولو پسيكوپاط، دارولو ياما مرة التّيست و فاتهم بنجاح، يعني السيد صحيح زي البومب .
