شنو هي الشبكة ؟

شنو هي الشبكة ؟
الشبكة كاتكون من اتصال ، جوج ولا كثر .. من الاجهزة لي كايكون مرتابطة من خلال وسيط نقل باش يتقاسموا الموارد ( مثلا الطابعات ولا السيدييات اي اقراص مدمجة .. ) تبادل الملفات ، و يمكن نربطوا الاجهزة مع بعضها على الشبكة من خلال كابلات ولا اسلاك ولا هوائيا
انواعها :
شبكات العواصم الكبرى MAN.
شبكة المنطقة الواسعة WAN.
الشبكات المحلية LAN.
شبكة شخصية PAN.
شبكة تخزينية SAN.
كاينين جوج انواع لي شايعين بزاف هما :
الشبكة المحلية : ( LAN )
Local Area Network :
الاجهزة كاتكون قريبة من بعضها جغرافيا يعني فنفس المبنى مثلا ، و هاد الشبكات كانخذموها لتغطية اماكن محدودة و صغيرة بحال الدار ولا المكتب
شبكة المنطقة الواسعة : ( WAN )
Wide Area Network :
الاجهزة هنا كاتكون بعيدا كل البعد عن بعضياتها و كاتكون مربوطة بخطوط الهواتف ولا هوائيا ، كانقصد الشبكات لي كاتغطي مناطق جغرافية واسعة ! و يمكن نستخذموها باش نصيلو الشبكات المحلية ( LAN ) مع بعضها حيث يمكن للمستخذمين فمنطقة ما يتواصلوا فمنطقة اخرى ..
شنو هو الانترنت :
الانترنت هو اكبر شبكة كمبيوتر فالعالم ، كايربط ملايين من الاجهزة و لي كايسمحلينا باش نتبادلوا المعلومات بين الشبكات الصغيرة ..
ملحوظة صغيرة :
يقدر يبانليكوم هادشي صغير و بسيط و كاين لي غادي يكون عارف هاد المعلومات ولكن كاين لي ماعارفش ! المهم عممت و بديت من 0 باش لي عرف يزيد يعقل على هادشي .. ولي معرفش ايتبع هادشي .. ! مآعمركوم تحقروا معلومة ولو صغيرة را منين بدينا نتعلموا بدينا من الحروف و الارقام البسآاط .. تحياتي
نوضح كثر .. عندكم جوج دراري بغاو يلعبوا كونتر صافي ؟
جابو كابل ديال شبكة و ربطو طرف بالجهاز الاول و طرف بالجهاز الثاني
صافي بداو يلعبوا بغض النظر على كيفاش تبثوا ال ip و كيفاش تم الاتصال داكشي غادي نتطرقولوا من بعد..
الاتصال لي ما بينهم يسمى شبكة ، شبكة صغيرة
اك ، ايلا شي شخص رابط طابعة مع الجهاز ديالو وربط كابل ديال شبكة من جهاز ديالو لجهاز آخر ؟
يمكن الجهاز 2 يستخذم موارد الجهاز 1 ؟
وي اكيد ، بغض النظر عن الصلاحيات و لكن يمكنلو !
كل شبكة شنو كتحتاج؟
1- وسط انتشار البيانات
2- Network InterFace Card
3- Protocol
وسط انتشار البيانات :
من خلال كابل شبكة او هوائياً
انواع الكابلات غادي نتعرفوا عليهم في الدروس القادمة ،
ولكن انت اذا ربطتي كابل بين جهازين غادي يتم تبادل البيانات من خلال الكابل ،
صورة 1 : كابل الشبكة
شنو كايعني هوائياً ؟
انت اتصلتي براوتر ( Router ) ، من اتصالك هذا
يتم ارسال واستقبال بيانات هوائياً لا يمكن رأيتها ،
نمشيو لكرت (carte) الشبكة :
بطاقة الشبكة او اختصار NIC
الاختصار لـ Network InterFace Card
و صممت باش تسمح لمستخذم الحاسب باش يتواصل مع الحواسيب الاخرى عن طريق شبكة حاسوب !
كاتأمن بطاقة الشبكة جوج حوايج هما:
الوصول المادي ولا الحقيقي لشبكة .
مستوى منخفض من عنونة النظام من خلال استعمال رقم MAC Adresses .
كتاصل بطاقة الشبكة مع اللوحة الأم مع :
منافذ الـ PCI .
مدمجة مع اللوحة الأم .
منافذ الـ ISA .
كاتكون لاكارط وحدة من هاد الانواع :
الإيثرنت السريعة Fast Ethernet .
الجيجا إيثرنت Gigabit Ethernet .
الألياف الضوئية Optical Fiber .
سرعات بطاقة الشبكة :
10 Mbit/s .
100 Mbit/s .
1000 Mbit/s .
كاتوصل تال 160 Gbit/s .
المصانع لي مشهورة هي :
Novell .
Intel .
Realtek .
.: اكمال احتياجات الشبكة للعمل :.
: Protocol :
مثال بسيط قبل مانبداو !
عندكوم آدم و عندكوم ريم هههه
آدم كايدوي بالانجليزية
و ريم كاتدوي المانية
بجوج كايدويو فنفس الوقت ، زعما غادي يفهموا بعظياتهم ؟ اكيد نن
هادشي علاش كانستعملوا مترجم كايكون كيعرف اللغيتن بزوج باش يفهموا بعضياتهم ( غير فالكورة الذهبية راكم كتشوفوا )
من هنا غادي نعطيو تعريف ال Protocol :
كنسميوه ايضا الميثاق (البروتوكول) و كايشكل معيار أو اتفاق كاينظم و كايمكن من إجراء عملية ربط (connection)، الاتصال communication ، ونقل البيانات بين جهازين. نزيد نبسط ، يمكن نقولو على الميثاق أنه "قواعد التحكم" (the rules governing) الصياغة النحوية (syntax)، والدلالية (semantics) والتزامن (synchronization) في عملية الاتصال. يمكن تطبق المواثيق من قبل عتاد صلب (solid hardware) ، أو برمجيات او خليط يعني من هنا ولهيه.
كايتعتابر الميثاق فأدنى مستوياته سلوك الاتصال فالعتاد الصلب.
تعريفي هههه :
لغة التواصل بين الحواسيب على الشبكة .
Microsoft : TCP/IP
Linux : TCP/IP
Mac : apple-talk
Internet : TCP/IP
يعني يلا بغينا نوصلوا جهاز نظامه Mac
و جهاز نظامه Linux
يمكن لينا ؟؟نن
السبب ؟
عدم توافر نفس البروتوكول في الجهازين
البرتوكول المشهور هو TCP/IP لذلك جميع الانظمة و الاجهزة ولات كاتدعمو .
ويلا كان شي نظام مافيهش هاد البروتوكول ، غ حيدو
غادي نتطرق لشرح البروتوكول TCP/IP بشكل مفصل بزاف , فليام لي جاية ان شاء الله
كاين بروتوكولات بزاف بحال
DHCP
SMTP
HTTP
غادي نشرح بعض البروتوكولات كيف قلت .. وكل بروتوكول عندو طريقة عمل و طريقة برمجية فشكل ..
والسلام عليكم ..
غانعاود نقولها هادشي بسييط بالنسبة لبنادم لي مافاهمش ڭاع بلا مايجي يتفلسف عليا شي حد .