مدرب المنتخب المغربي هيرفي رينارد

إيرڤي رينارد عيّناتو الجامعة فشهر يناير اللّي فات مدرب للمونتخاب من بعد ما جرّات على الزّاكي حيت ما بقاش كيسمع للهضرة و للتعليمات.
منحة التوقيع كانت مية مليون سنتيم، و راتب شهري 61 مليون شهريا (حسب مصادر الجامعة) و ڤيلا راقية و سيارة رباعية الدفع و بون بنزين مفتوح و ربعة تذاكر طيّارة ذهاب و إياب كازا-باريس شهريّا.
من بعد ما تأهل المونتخاب للكان، طلع الصالير لثمانين مليون سنتيم شهريا، و حاول تخيّل راسك عزيزي القاريء نتا اللي خدّام ثمنية دالسوايع فالنهار، ستة و عشرين يوم فالشهر بستين ألف ريال فالشهر، غير تخيّل.
هاد إيرڤي رينارد، مهلّي فراسو مزيان، واخا فعمرو 48 عام، لكن كيبان فحال ولد عشرين عام، الطولة و الفورما و الكرش والو، و عزيزة عليه ديك القاميجة البيضا ما كيحيّدهاش، سي نورمال الشهر كامل مكيدير فيه والو، و ثمانين مليون داخلة، ما تابعو كرا ما تابعو ضو ما تابعو ما، ما تابعو مصروف، كلشي على حساب الشعب المغربي المقهور.
ثمانين مليون سنتيم شهريا باش يجيب لينا تعادل من الغابون و تعادل فمراكش مع الكوت ديفوار اللي على شويا كانو غا ينكحونا قدّام كل رؤوس الدولة لكبار.
رسميا، المغريب فقد كل حظوظو فالتأهل لكأس العالام، و إيرفي رينارد غادي مازال يبقا يشد ثمانين مليون حتى لنهاية 2018 فبلد فيه عشرالاف أستاذ قراو و تخرّجو و سالاو و ما لقاوش خدمة، فبلد بنادم كيتطحن فيه فكاميو دالزبل بحال لكلب حيت بغا يخدم على راسو و ياكلها حلال.
هذا هو المغريب، أزمل بلد فالعالام