المغرب هي الدولة الوحيدة اللي كتحتفل بذكرى عيد إستقلال ما كاينش أصلا

المغريب هو الدولة الوحيدة فالعالام اللي كتحتفل بذكرى عيد إستقلال ما كاينش أصلا و ما عمّرو كان فهاد النهار.
دول العالام كلّها خدات إستقلال ديالها فنهار واحد جْملة، إلاّ المغريب خداه طريطات،
-2 مارس 1956 وقّع المغريب مع فرنسا معاهدة إلغاء الحِماية و بالتالي الإستقلال عنها.
-7 أبريل 1956 وقّع المغريب مع إسبانيا إتفاقية مُماثلة باش تنساحب من منطقة الريف و الشمال.
-29 أكتوبر 1956 إسترجاع مدينة طنجة و إنهاء النظام الدولي اللي كانت فيه.
-15 أبريل 1958 غادي تلوح لينا إسبانيا مدينة طرفاية.
-30 يونيو 1969 من بعد حداش لعام غادي تعاود تلوح لينا إسبانيا منطقة سيدي إفني.
14 نونبر 1975 إسبانيا غادي تقسم الصحرا الغربية على جوج و تعطينا طرف (الساقية الحمرا) و تعطي طرف لموريطانيا (وادي الذهب).
14 غشت 1979 موريطانيا وقّعات إتفاق هدنة و سلام مع البوليزاريو و سمحات ليها فديك وادي الذهب، ناض المغريب جرّها لعندو و جمع كلشي حبّ و تبن.
كيبقا ديك 18 نونبر ذكرى عيد الإستقلال ديالاش ؟
ياك ماشي ديال شي طرف إسترجعو المغريب و ما فخبارناش أو ماقريناهش فالتربية الوطنية ؟؟
من نهار إستقل المغريب الإستقلال ديالو الأول ف 1956 و هو كيحتفل نهار 18 نونبر بعيد العرش ذكرى جلوس السلطان محمد الخاميس على كرسي العرش ف 18 نونبر 1927، غير مات و هو يقلب الحسن الثاني ستّة تسعود و رجّعو عيد إستقلال باش ما يبرزطوش تاريخ الإستقلال الفعلي (2مارس) مع عيد العرش ديالو أنذاك (3مارس) اللي كان كيتعلن فيه حالة الطوارئ فالمغريب، سيمانا و لبلاد مقلوبة بالأهازيج و الرايات و الشيخات كلشي مخلوع كلشي مرعود.
عالعموم كي 18 نونبر كي جوج مارس كي 34 أبريل، لبلاد من نهار خرجات منها فرانسا و إسبانيا و هي راجعة اللّور اللّور، المقاوم الدرويش اللي كان كيقاوم الفرنسيس من نيّتو جلس عالقالب، و اللي سرقو البطولات و الملاحم رجعو لفرانسا يعيشو فيها و يبنيو فيها الديور و لقصور و يقرّيو فيها ولادهوم.