الى سولك شي واحد فهاد الوقت شكون هو اغنى رجل عبر التاريخ شكون غادي اطيح ليك فبالك؟ ... امكن تقوليه بيل غيتس او جون روكفيلر اعظم رجل اعمال ف التاريخ او حتى جنكيز خان لي كان عندو الحماق تالفلوس ..
اوا اسيادنا تا واحد من هاد ولاد الناس مايقدر اوصل لشويا من داكشي لي كان عند واحد الملك من مالي سميتو موسى كيتا، هاد السيد تا واحد ماقدر اعطي شي رقم قريب لداكشي لي كان عندو.
موسى كيتا او مانسا موسى (مانسا كاتعني ملك) حكم الامبراطورية ديال مالي، حاليا (موريتانيا السنغال غامبيا نيجيريا التشاد الخ..) فالقرن 14 ما بين (1337-1312) لي كانت غارقا بالذهب و الملح انذاك ، فنفس الوقت لي كانت فيه أوروبا غارقا فالصراعات و المجاعة، كانت بزاف دالمماليك الافريقية ف ازدهار و رخاء.
موسى كان داير تمبكتو مركز التعاملات ديالو بحكم كانت هاديك هي البلاصة لي كاتمر منها كاع الطرق التجارية لي كاتربط بين اوروبا ودول الشمال مع غرب افريقيا ،هادشي لي خلا الثروة و النفوذ ديالو يزيد، هادشي كامل ماكنش كافي باش اتشهر موسى فالعالم و اتعرف العظمة ديال الثروة لي كانت عندو. تال واحد انهار ف سنة 1324 قرر امشي الحج و بما انا هاد صاحبنا ماكانش عندو مشكل من الجانب المادي قرر ادي معاه واحد القافلة لي كايقولو المؤرخين بلي كانت كاتمتد على حدود البصر.
الاغلبية ديال الشهادات و الوثائق التاريخية كاتافق بلى دا معاه عشرات الالاف ديال الجنود زيد عليهم العبيد و مئات الخدامة لي كانو مكلفين غي بالحمل ديال ااذهب لي دا معاه، وكدا العائلة و الاصدقاء لي رافقوه فالرحلة، خلي عليك الخيول و الجمال لي كانو هازين الذهب تاهوما هههه. مهم خونا بقا غادي تاوصل القاهرة تما السيد طلق الفلوس نيت،كاين لي اتصدق بيها على الفقراء ولي بنا بيها مساجد خلي الحوايج لي شرا تما. هادشي كان عندو بزاف ديال التاثيرات على النظام اقتصادي فديك المنطقة حيت كترات فيها الفلوس بزايد.
المهم الحاج موسى رجع من الحج من بعد ماذاع صيته ههه، ووصلات خبارو ل اوروبا والشرق كامل شي لي خلاه اولي اسطورة و اوضع الاسم ديالو و ديال الامبراطورية ت مالي ف atlas catalan ( من اهم الخرائط لي تقادات فديك الوقت لي كاينة حاليا فالمكتبة الوطنية الفرنسية فباريس، هاهيا لخريطة فالصورة الثانية).
الثروة المادية ماكنتش الهم الوحيد ديال الحاج موسى السيد بنى بزاف ديال المساجد والمدارس و واحدة من اكبر الجامعات فديك الوقت بالمساعدة ديال شي مهندسين من الاندلس لي جاو معاه فاش رجع من مكة ، شي لي خلا تمبكتو خاصة تولي قبلة لبزاف ديال الطلبة و العلماء من العالم الاسلامي كامل.
مانسا موسى مات سنة 1337 م، لكن الارث ديالو باقي لحد الان من مساجد مدارس و مكتبات بقات شاهدة على العصر الذهبي من تاريخ مالي، لي لسخرية القدر كتعتبر دبا من افقر البلدان فالعالم.
ملي تاحد ماقدر افهم الحجم ديال الثروة لي عندك عرف بلي راك كاتجسد المعنى ديال خانز فلوس
