نبع الحنان

فوقما كيتجبد حس الام فشي مجمع فتلقائيا كتلقى كولشي كيهضر على الحنان و العطف و ان الام اكتر وحدة تبغي تشوف ولادها مرتاحين و هادا هو العادي ولاكين كاينين استثناءات على هاد القاعدة لامهات كيسمحو فولادهم ولا كيعذبوهوم گااع سواء نفسيا ولا جسديا ولاكين قليل فاش كتسمع ام قتلات ولادها .. " تريزا كنور " ماشي ديال الدجاج .. سيدة عاشت و كبرات فالماريكان وسط عائلة متوترة بسباب ان باها مريض شاد الركنة عاطيها للنگير و مها هي لي كتصرف على الدار .. كانت تريزا متعلقة بمها بزااف و كتبغيها بجهد هاد الحب لي غادي يتقادا نهار تموت مها حيت جاتها سكتة قلبية و باها غيبيع الدار و كولشي غيتشرد .. تريزا نضرا لهاد الضروف تزوجات و هيا عندها 16 عام باش تعيش الحياة السعيدة ولاكين لي منحوس را منحوس كانت ديما مطايفة مع راجلها حيت كتشك فيه كيخونها تالواحد النهار و كانت هي حاملة غادي تضارب مع راجلها و يقرر يخوي ليها الدار كولها تمرح فيها .. تريزا غتسكت و تخليه يمشي بحالو ! لا حاشا و لله مكانتش من العاجزين هزات الفردي و عطاتو بقرطاسة فراسو حطاتو ميت .. فالكوميسارية قالتلهم بلي قتلاتو حيت كدافع على راسها و ان بغا يتعدى عليها و هو سكران و حيت ميريكان بلاد الحق و القانون طلقوها و خرجات من القضية سالمة .مور ما خرجات ولدات بنتها التانية حيت ديجا كانت والدة ولد من المرحوم راجلها .. و انطلاقا من ديك اللحظة غتبدا مغامرات جنسية كتيرة مع بزاف ديال الرجال سواء زواج ولا غير كضحك على ولاد الناس .. تزوجات 4 د المرات و ولدات 4 دراري خرين ( سوزان ، ويليام ، روبرت ، تيري ) و اخر زوج ليها مور ما طلقات منو ولات سكايرية من الطراز نتاع ماريو و ولات كتعامل ولادها بطريقة خايبة كضرهم ، كطفي فيهم الگارو ، كتحبسهم و لي لقاتها قدامها كتشير عليهم بيها .. من لخر كانت ماشي ساهلة .. ولدها الكبير مور مشاف هاد التعامل علق من الدار و الجيران كانو ديما كيتشكاو من صداعها و ريحت دارها لي شبعانة بول .
المهم هو ان تريزا مكانتش كتحمل بناتها خصوصا ملي كبرو و بدات علامات الانوثة كتبان عليهم و هي شرفات و مابقاتش عاطية للعين .. غارت الشعيبية و بدات ببنتها سوزان ، هاد البنت غتعيش تعذيب مقود من مها حتا هربات تشكي للبوليس ولاكين تريزا قالت ليهم ان بنتها هبيلة و رجعوها ليها باش تكمل عليها ما خصها تالواحد النهار بداو فالمخاصمة و تيرات فيها تريزا بقرطاسة جاتها فضهرها ، مماتش سوزان و مها ماعيطاتش لاسعاف .. بقات فالدار تا برات ولاكين القرطاسة بقات فضهرها و هادشي ماحبسش هنا مرة خرا ضرباتها بمقص و خلاتها تا برات بوحدها فالدار مكاين لا طبيب لا سيدي زكري .. حتا تريزا عيات من سوزان و خلاتها تمشي بحالها بشرط تحيد ليها القرطاسة باش ماتعلمش بيها البوليس ، وافقات سوزان .. شرباتها مها دوا ديال المسطيين و زادتها شي مهدءات تا بدات كتفقد الوعي و حلات ليها لحمها بالموس و بدات كتحاول تحيد ليها القرطاسة ولاكين سوزان جالها تسمم فالدم و فاش عاقت تريزا داتها للسبيطار !! ههه نن فاش عاقت تريزا داتها لجنب الواد و شعلات فيها العافية ولاحتها ..
مور ما ماتت سوزان غادي دوز هاد الام لبنتها لخرا شيلا .. غتلوحها تولي عاهرة باش تجيب الفلوس فلول كانت الامور مزيانة و تريزا فرحانة تالواحد النهار فاش غتاهم بنتها بلي مريضة بشي مرض جنسي معدي و تعزلها على خوتها وسط واحد البيت غتبقى فيها
شيلا بلا ماكلة ولا شراب تا تموت .. الطامة ان تا واحد ما عرفها ماتت تا تحللات و عطات الريحة .. عاد داروها فصندوق ولاحوها جنب الطريق .. ولاكين الريحة بقات عاطيا و هنا غتقرر تريزا تحرق الدار و تعلق مع ولادها لي بقاو لشي قنت اخر .. عطات للبنت الصغيرة تيري شعلات العافية ولاكين الجيران قدرو يطفيوها ..
ولاد تيريزا كولهم غادي يخليوها مور ما ولاو قادرين يصوفيو كرهم و غادي يبقى معاها غير روبرت لي تا هوا ماطولش تا شدوه البوليس مور ما بغى يسرق شي حانوت اوا وي خارج لمو .
هنا غيجي الدور ديال البنت تيري لي كانت ديجا هربات من مها مور ما حرقات الدار و عاشت بلاكارط ناسيونال ديال ختها الميتة شيلا فعام 1993 غتمشي للبوليس و تعاود ليهم كولشي لي دارت مها .. و غيعتاقلو تريزا لي عتارفات بكولشي بشرط انهم مايحكموش عليها بالاعدام .. شدات مؤبد و راها فالحبس ديال ماريكان
فيلم الرعب " the afflicted " متقبس من قصة تريزا كنور.