أنوناكي

(ايلا كنتي اول مرة تاتسمع بمصطلح أنوناكي فكننصحك تقرا و تضحك مع راصك لان هادشي غايفرشخ واحد الرمانة كبيرة ) .
كنت درت مقال حول أن النازا مخبيا علينا كوكب وحقائق علمية , و ان السومريين توصالو مع الكائنات الفضائية , و باش ان بنادم ايكون غادي معايا فالخط عطيتو الاطروحة و المصادر باش انه ايعطينا الراي ديالو حول هاد المواضيع لي تاتروج بزاف فمواقع ديال عريبان , و قلت الراي ديالي و مع ذلك بنادم صحاب ليه واش أنا مامن بداك التخربيق مع ان الثيم ديال الموضوع كان ( نقاش) , و كنت عوال نمسحو بعدما نخرجو بخلاصة لكن لا حياة لمن تنادي .
أوكي , الانوناكي (حسب السوماريين) او لي كايسمييوه الناس دابا رواد الفضاء القدماء ,حسب الخرافة , فهم نوع من الكائنات الحية المتطورة لي جاو هادي 450 الف سنة قبل و شدو الانسان(النياندرتال) و لقحوه مع جيناتهوم و خرج ليهوم الانسان الذكي , و هاد الانسان خدمو بيه الانوناكي باش ايستخرجو الذهب لانهوم محتاجينو فالكوكب ديالهوم .

غانرجعو للوراء و نشووفو اول شيء بدات فيه هاد الخرافة د الانوناكي لي فيها شويا د اللوجيك العلمي لي مقاد بطريقة ماشي عادية , اول واحد هضر و قال كلمة الانوناكي فعالم سميتو (زاكر سيتشن) .
هاكو نبدة تعريفية عليه !
(goo.gl/qWrNtH)
ملايين ملايين النسخ تباعت من الكتوبا ديال هاد خونا د الانوناكي فالحقبة ديال السبعينات , و لي هي حقبة الحرب الباردة و تحديدا السنوات ديال زعم أمريكا انها كتاشفات صحن طائر , يعني ان زاكر سيتشن استغل هاد التعنكيش كامل باش ايدير لابوز و الموشكيلة داكشي كامل لي تاتقراو على الانوناكي فماقالات (صحاب المؤامرة) راه كدوب ديالو بل اكثر من هادشي راهو تدليس و بهتان و كدب فكدب , وايلا قريتي البيوكرافي ديالو غاتلقا ان ماعندوش شي علاقة لا بالاثار لا باللغات القديمة لا بالفلك لا بالتااريخ , مي عندو ديبلوم فالصحافة و الاعلام اذن فهو عارف كيفاش ايدير خبر و ايربح منو الملايين لانه ولد الحرفة .
أنوناكي بالنسبة ليه هو كاتعني (القادمون من الجنة ) , لكن كل الخبراء ديال اللغات القديمة كاتقول بلي المعنى الحقيقي ديالها هو (صاحب الدماء الملكية) , و الانوناكي كان كايتعيط على الملوك لي كايحملو دماء (أنو) زعيم الالهة و فقط , ماكين لا فضاء لا هم يحزنون , البروفسور (مايكل هيسر) هو شخص عارف التدليس ديال و دار موقع سميتو (سيتشين على خطأ) و هاكو موضوع كايشرح فيه مايكل معنى كلمة أنوناكي :
(goo.gl/ewmxE1)
الرموز لي كانشوفو فالمعابد راهوم مقادين من عند السي زاكر و موضفهوم بطريقة كايلوي فيها عنق المعنى ديال .
كوككب نيبرو
, هو متعلق بالانوناكي بزاف حسب السومرين كيما كايقولو , غانمشيو عند واحد العالم سميتو ( ديفيد موريسون ) لي كايعرفوه الناس ديال الفلك المغاربة بزاف , راه كايجاوب ف ديك اللعايبة تاع الناسا لي سميتها "Ask an Astrobiologist"
(goo.gl/U0XVA6) ولي بغا ايسولو ايمشي هاهو الرابط .
هاد السيد كاايتلقا يوميا اسئلة حول كوكب نيبرو و اغلبها سبان فسبان فحين ان الناس كايخلطو بين نيبرو لي غايضرب كوكب الارض و بلانيت ايكس لي تكتاشف هادي عشر سنين تقريبا
دافيد موريسون فمقالاتو دائما كايقول بان بلانيت اكس هو اي كوكب فالكون تم الاكتشاف
ديالو حديثا و مازال الاسم ديالو ماتعطاش ليه , و بلانيت ايكس هادي عشر سنين هو كوكب قزم صغير على بلوطو شويا و سميتو (أيريس) , و فاللول سماه المكتشف ديالو (زينا) على وزن بلانيت ايكس لكن بدلو ليه السمية حيتاش سبب هاد الكوكب القزم ارتياب فمواقع التواصل الاجتماعي و رجع الانوناكي و فرضية انه غايجي ايضرب الارض تاني للواجهة من السبعينات و كايبان ليا بلي اكثر النااس لي نشرو الاشاعة هي هاد الصحف ديال عريبان هاكو مقالات اعيباد الله د صحف كبار فالشرق الاوسط كايهضرو على الانواناكي و كوكب نيبرو
(goo.gl/7p1NoP) صحيفة الرياض
(goo.gl/N0q75i) صحيفة الراي الكويتية
فمابالك بالفيديوات ديال النوبس لي باغين ديك 100 دولار د الادسنس فقط ماكايهمهوش البحث فالمصادر و المصداقية داكشي لاش كايزيدو و المغاربة كايكوبيو و ايخراو فالسروال