مصرانة زايدة ( الزائدة الدودية )

 
مكانش فينا لي عمر سمع بشي واحد قريب ليه اولا كيعرفو قالو عليه فيه مصرانة الزايدة ولكن المقصود هو التهاب المصرانة زايدة (زائدة دودية/ابنديس) هاد الالتهاب كيوقع حيت هاد المصرانة الزايدة لي موجودة عندنا اسفل بداية المصران لغليض كتبوشا بشي مخلفات و خيخي لي عندنا فالمصارن، و لكن الموضوع ديال اليوم هو عن دور هاد المصرانة الزايدة لي كيقولو عليها زايدة معندها حتى شي دور و التطور ديالها مع تطور الانسان و بعض الكائنات لي حتى هيا عندها مصرانة زايدة.
بزاف ديال العلماء كيستعملو هاد المصرانة الزايدة كحجة على تطور الانسان لعدة اسباب اهمها هو ان الانسان ديال شحال هادي كانت عندهم مصرانة زايدة لي كانت خدامة عندهم و الحجم ديالها كان اكبر داك الوقت و حنا الانسان ديال هاد العصر غير شايطة و الحجم ديالها كيتقلص، العلماء قاموا بخدمتهم و توصلو لواحد النتيجة لي هيا ان الانسان ديال شحال هادي المصرانة الزايدة كانت كتعاونو على الهضم و تجنب الاسهالات و التسممات بحكم ان بنادم كان كيتغدا غير على النباتات فقط و لي ماعارفش واش ديك النباتات سامة و غادي ضرو و غادي زايد كياكل لي فطريقو حيت هاد المصرانة عندها افرازات لمفاوية لي كانت تقوي المناعة ديالهوم و تحتوي على بكتيريات لي كتساعد و تسهل عملية الهضم بطريقة تحافظ على صحة بنادم، هاد المصرانة الزايدة كتواجد حاليا عن مجموعة من الحيوانات لي عندها بنفس الحجم لي كان عن الانسان القديم مثل الكوالا، القنادس، القنافذ...الخ و عندها نفس الدور لي كان عند بنادم.
الان ندخلو شوية فنظرية التطور فبحكم ان الانسان اذكى الكائنات كلما كيدوز الوقت و كيعرف المأكولات لي كضرو ولا لا و المأكولات لي تقدر تخلق مشاكل فالجهاز الهضمي او المناعاتي و بقا كيتجنبها مع مرور الوقت و سي بنادم كتاشف انه يقدر ياكل اللحم و مع اكتشاف النار صبح كيطيب الماكولات ديالو باش يسهال عليه الاكل و يقضي على الميكروبات لي فالاكل ديالو و بالتالي شوية بشوية المصرانة الزايدة ولات كتلقا نفسها ماكاتدير حتى شي مهمة و تقبلات نفسها غير زايدة حيت الانسان فهم و عرف المسائل لي تقد تهلكو و بالتطور ديال الجسم و العقل ديالو و مع مرور الوقت المصرانة الزايدة ولات كتنقص فالحجم ديالها حيت مبقاتش عندها شي خدمة تقوم بيها وفنفس الوقت فقدان الفعالية ديالها لنفس السبب و حاليا المصرانة الزايدة باقي كتفرز نفس الافرازات بنسبة قليلة ليماعندها حتى شي دور نظرا لان الانسان كيعرف شنو ياكل بطريقة عقلانية.
عموما هادشي هو لي كيفسر عدم وجود دور مقنع لهاد الجزء في جسم الانسان حيث تطورت حوالي ثلاثين مرة باش صبحات عندنا بهاد الحجم الصغير و بدور غير فعال و من المحتمل ان المصرانة الزايدة تستمر في التقلص و احفاد احفاد احفادنا يصبحو غير سامعين بيها.
ايلا بغيتي تزيد تقرا
http://www.sciencedirect.com/…/article/pii/S1631068312001960
http://www.em-consulte.com/article/850993/alertePM