إميضر، هيا واحد القرية صغيرة على الطريق الوطنية رقم 10 فإقليم نتغير فالجنوب الشرقي للمملكة المغربية الشقيقة. وكاتبعد على وارزازات ب 100 كلم وعلى مراكش ب 300 (#300kmsouth) (https://goo.gl/UnH5tj) .
هاد القرية معروفة بواحد القضية لي هي من اقدم القضايا فالمغرب، وقدم من مشكل الصحراء. الغريب ان المشكل مماحتاج لا حكم داتي لا قوات المورينسو لا بانكيمون إعرب على القلق ديالو. المشكل هو انه كاين واحد المنجم ديال الفضة بجانب القرية. المنجم كان كايتستغل من طرف فرنسا وملي خرجات شداتو العائلة لي فراسكوم. المشكل هو ان شركة "مناجم" التابعة للهولدينك الملكي ولي كاتستاغل المنجم كاتستعمل المياه الجوفية ديال المنطقة فالمصنع. الامر لي ادى الى جفاف الأبار. وكذا مشكل النفايات الصلبة لي كايطرحها المصنع ولي كاثلوت المنطقة. بالإظافة الى عدم إستفادة شباب القرية من الخدمة فالمنجم.
المشاكل الأولى بانت من ستينيات القرن الماضي، ولكن ديك الساعات لي دوا إرعف. ولكن للصبر حدود. سنة 1986 جات الشركة تحفر بير من فوق الواد لي كايسقيو منو الاراضي الفلاحية ديالهوم. ملي السكان حتاجو تعتاقلو 6 ودوزو سنوات فالسجن بدون محاكمة وتم حفر البئر بمباركة البوليس والسيمي ومن بعدو بزاف تضطرو اخويو البلاد حيت مابقاش باش اسقيو الاراضي. 1996. مطالبة شباب المنطقة بالتشغيل واستتمار عائدات المنجم فتنمية المنطقة غادي ادي لإعتقالات ووفيات منها "لحسن اوسبضان" لي كايعتابروه شهيد القضية.
"حنا مابغينا منهوم والو، غير حقوقنا لي تافقنا معاهوم عليها سنة 1986، ولي هيا. اخدمو ولاد البلاد و مايخويوش لينا المياه الجوفية ويوقفو الثلوت و يخدمو التنمية ديال المنطقة كيما كادير نفس الشركة -مناجم- ف كماسة وف بووازار، ولكن ماكايديرو معانا تا حل، وعوض مايجي شي مسؤول كايجي السيمي" هادشي لي كايقولو سكان ديال القرية (تصريح واحد المرأة فمظاهرة اليوم https://goo.gl/t8Y7oU ).
سنة 2011. بعد ما تم القمع ديال واحد المظاهرة ديال النساء والاطفال لي نظماتها حركة "على درب 96" (https://goo.gl/1aG0YV) بواحد الطريقة فشيشكل (انزال هليكوبتر ديال الدرك تا قربات نتزل على ريوسهوم. (https://goo.gl/sX2QiB) واعتقال مصطفى اشطوبان) السكان ديال اميضر دخلو فاعتصام حدا واحد البئر لي كاتستاغلو الشركة فوق واحد الجبل سميتو "جبل البان" (https://goo.gl/zLWx71) ومن تماك تال اليوم مازال الاعتصام مستمر كاطول اعتصام فتاريخ المغرب (5 سنوات).
القرية حاليا فيها مستوصف مسدود مافيهش الطبيب. دار ولادة خدمتها انها كاتعطي الورقة للنساء باش امشيو للمستشفى الاقليمي بداعي عدم وجود التجهيزات. فيها مدرسة مبنية من الاستعمار وكوليج جديد ولكن فيه الاكتضاض اليوم 20/11/2016 دارو مضاهرة جديدة ومشاو للمنجم، لكن كيما قال سي مروان المحرازي العلوي (https://goo.gl/n3pDoU) : دولتنا الحبيبة ارسلت لهم مئات عناصر السيمي باش يحميوهم من أذى الحيوانات المتوحشة الممكن تواجدها في هديك المنطقة والسهر على راحتهم .
ملي كاتشوف اننا فمغرب 2016. مغرب cop22. فواحد المنطقة لي فيها اكبر منجم للفضة فافريقيا لي كايدير رقم عملات كايوصل ل 8 مليون درهم فاليوم (https://goo.gl/OFrvKL https://goo.gl/jyPVFY). وتشوف ديك القرية وناسها كي عايشين. كاتقول "الفثنة نائمة لعن لله من يوقظها"
