المجتمع الطفولي المغربي

وراء كل فاتيفلوغة او حجابي عفتي جيل معطوب اغتصبها فكريا.. دونك صديقي الشمال إفريقي ماتلومش الفاتيفلوغة على فكرة أنها موجودة فالحياة من اجل تكون زوجة صالحة تطيع و تكون تحت جناح زوجها و يكون هادا حلمها.. و ماتلومش حجابي عفتي على دور العفة لي كاتلعبو.. هادشي تشربو بيه ترعرعو فيه كبرو عليه و ترقدو مزيان بشرمولة ديال أفكار خامجة ديال جيل معطوب لي هو آبائنا الأولون.. و لي بدورهوم شربو من نفس الروبيني المسمم من قبل و حتا هوما دارو واحد تيو طويل لصقوه فالراس د الروبيني و جاو يسقيونا منو.. كاين منا لي شربات منو و كاين منا لي وعات أن هاداكشي سم فكري و خدات البادرة باش تغير من واقيعها و كاين منا لي ماقدراتش تدير حتا محاولة لعدة اعتبارات بحيت كاتشوف بلي هاداك واقع مفروض عليها و لا مجال للهروب منو.
سو خاصكوم تعرفو بلي أكبر متضرر من صراع الأجيال هن الإناث.. علاش؟.. لأننا تربينا على أن البنت ماعند ربها الحق فحتا حاجة خاصها تشوف تسد فمها و خرزتها حتا يجي لي يحل ليها الخرزة و لكن الفم خاصو يبقا مسدود.. و ضريبة تهضري على حقك هي تكوني قحبة.. لأنهم يعتبرون أي محاولة تمرد على ما هو متعارف عليه عندهوم تقحبين و تزنديق و بلي بغيتي طيري.. اي محاولة تحرر كاتعني بلي زملتي.
هاذا علاش أول مبادئ الثوران هي تمحي مايسمى بالعفة و الحشمة من قاموسك صديقتي.. و اكتر حاجة كاتساعد شوية مع هاد القوم هو الاستقلال المادي.. الا وفرتيه فراك قطعتي شوط كبير نحو التحرر.. طوري أفكارك و ثقفي نفسك بأي حاجة تقدري ديريها سواء بالتجربة ولا بالبحث.. باش حتا الا دويتي يكونو عندك مرجعيات صحيحة و تقدري دافعي على نفسك.. ماتخليش قمعهوم لأول محاولاتك يأثر عليك من الفشل ننجح.. كوني متمردة.. فالتمرد لا يعني أنك خايبة بل هو جمالك.. الفتاة التي لا تطمح أن تكون مقودة فمجتمع مقودة عليه علاش عايشة.. تهلاي فنفسك راه ماعندك غير راسك.. تسلحي بالأنوثة ماتخليهومش يضربوك بسلاحك.. كوني متجددة و كل نهار عندك فكرة.. لا تبحثي عن المثالية فلا وجود لها فقط كوني أنت و الباقي إلى دار جهنم.. لي بغاك يبغيك بخنونتك ولا يقااود لهلا يرد بوه..
و أخيرا لا يتغير ما بقوم حتا يغيّروا ما بأنفسهم.. آمنن بأنفسكن و بأن الخير قادم لأنه حتما قادم إلا درتي ليه طبعا علاش يجي...
كفانا أجيالا معطوبة خاص داك نمط التفكير البيريمي يوقف عندنا...
قبلاتي الحارة أزدقائي زديقاتي