هاد البنت لي في الصور سميتها Patraporn أه سمية تاتديك بعيد بالمخيلة ديالك مي هاد السمية في تايلاند تاتعتابر من أجمل الأسماء, داكشي علاش أنسميوها Patra باش نتفاداو داك التشابه لي فالكلمات... أجي نعرفو كفاش تعرفت على Patra.
أربع سنوات قبل دخلت لواحد الموقع سميتو Interpals هاد الموقع الفكرة ديالو هي أنه chat ولكن ناشي باس نزوج ودير الوريقات لا لا لا هاد السيت متخصص غير في تبادل اللغات يعني إلى دويت معاك غير باش نعلمك لغتي و تعلمني لغتك للأسف حنا العرب فين ما كشينا مخصرينها (يمكن لكم تدخلو و تأكدو) لي تاتسولها مالك مع العرب تاتقوليك مع السلام مع تايقولها تانبغيك لدرجة انه الأغلبية أصبح تايبلوكي أي عربي يدوي معاه المهم هذا موضوع طويل... فهاد الموقع تعرفت على أصدقاء بزاف كين لي تلاقيتهم مياشرة ولكن الصداقة لي كانت قوية بزاف هي مع هاد Patra لي مزال لحد الساعة.
المهم Patra فعمرها 24 سنة خريجة معهد هندسة و الديانة بودية, أول ما دويت معاها في داك الموقع لقيتها easy ما فيهاش لعياقة ديال نتا أفريقي لا سمحلي ما ندويش معاك بالعكس تقبلاتني بكل سرور دوينا نهار تا ولينا في 4 سنوات ديال الصداقة... patra تانعرف أفراد عائلتها واحد واحد لأنهم 4 فقط و تانعرف الغرف ديال المنزل ديالهم بيت بيت ههه لدرجة الأب ديالها تايحترمني لواحد الدرجة تحلف عليه تايعرفني من شحال هادي.
فهاد 4 سنوات أنا و patra دوينا فبزاف ديال المواضسع و تشاركنا بزاااف ديال اللحظات و في أول سنة من التعارف ديالنا الصديقة رسلات لي واحد الهدية لي تانعتبرها من أغلى الأشياء لي تعطاوني فحياتي و لحد الساعة أي حاجة وصلاتني منها مخبها و مشدد عليها الحراسة ههه أجيو تشوفو معايا أشو صيفطات لي patra أول مرة....
- واحد السناك بتوابل التايلندية
- جوج ديال الألعاب كانو تايتعطاو الأطفال شحال هادي (قبل مايبان الأيفون و الأندرويد ههههه) و مصوبين من أوراق النخل تاينحتوهم على شكل أسماك و تايسبغوهم
- جوج ديال لي كارط بوصطال الأولة فيها صورة ديال المحطة القطار و هاد المحطات تقدر تشوفهم فالتايلاند كاملة حيتاش تايتعتابرو من التقاليد و رمز من رموز البلاد ما حيدوهمش و حتافظو بنفس العربات لي كانو من شحاااال هذا و باقين خدامين إلى يومنا هذا وخا دبا ولاو عندهم لي "سابواي" و لي "سكاي تراين" هداكشي تحت الأرض و فوق الأرض ولكن هاد القطارات تايمشيو شي مناطق غبوية و قروية ما تاوصلش ليهم "سابواي" ههه
و الصورة الثانية عبارة على أشهر و أجمل المعبد فالتايلاند سميتو "wat phra kaew" في القديم أمر الملك باش يبنيو هاد المعبد باش يكون معبد ملكي ولكن الملك لي حاكم الأن قرر باش يبدل ليه البلاصة و يولي متحف.
مزال بزااااف ديال الهداية لي وصلوني من Patra فهاد 4 سنوات وحالا كاين واحد الباكيدج تانتسناه يوصاني لدار... حاليا أنا و patra أكثر من أفراد عائلة و قريب نتلاقاها هي و العائلة دياها عندي في الدار صيفطة ليهم الدعوة مزال ما تافقوش على الوقت نهار يجيو نعاود لكم التجربة كيف دازت
